କଟକ: ଓଡ଼ିଶା ସର୍ଭେ ଓ ସେଟଲମେଣ୍ଟ ରୁଲ୍ସ, ୧୯୬୨ ଅନୁଯାୟୀ ଜମିର ସୀମା ନିର୍ଦ୍ଧାରଣ (Demarcation) ପାଇଁ ଜମିମାଲିକଙ୍କୁ ଅନଲାଇନ୍ ମାଧ୍ୟମରେ ଆବେଦନ କରିବା କିମ୍ବା ପ୍ରତି ପ୍ଲଟ୍ ପାଇଁ ₹୮୦୦ ଦେବାକୁ ବାଧ୍ୟ କରାଯାଇପାରିବ ନାହିଁ ବୋଲି ଓଡ଼ିଶା ହାଇକୋର୍ଟ ରାୟ ଦେଇଛନ୍ତି।
ଜଷ୍ଟିସ୍ ଶଶିକାନ୍ତ ମିଶ୍ର କହିଛନ୍ତି ଯେ ସରକାରଙ୍କ ଅନଲାଇନ୍ ଡିମାର୍କେସନ୍ ବ୍ୟବସ୍ଥା ଓ ₹୮୦୦ ଫି’ ବିକଳ୍ପ ବ୍ୟବସ୍ଥା ଭାବେ ରହିପାରିବ। କିନ୍ତୁ ଯେଉଁ ଆବେଦନକାରୀ Rule 38 ଅନୁଯାୟୀ ଅଫଲାଇନ୍ ଆବେଦନ କରିବାକୁ ଚାହାନ୍ତି, ସେମାନଙ୍କୁ ଅଫଲାଇନ୍ ଆବେଦନ ଗ୍ରହଣ କରିବାକୁ ମନା କରାଯାଇପାରିବ ନାହିଁ।
ମାମଲାଟି ଶ୍ରୀ ଗଡ଼ଗଡେଶ୍ୱର ମହାଦେବ ବିଜେଙ୍କ ଜମି ସମ୍ପର୍କିତ ଥିଲା। ତାଙ୍କର ୧୧ଟି ପ୍ଲଟ୍ର ପ୍ରାୟ ୨.୬ ଏକର ଜମି ରହିଛି। ଜମିର କିଛି ଅଂଶ ଜବରଦଖଲ ହୋଇଥିବା ଅଭିଯୋଗରେ ସୀମା ନିର୍ଦ୍ଧାରଣ ପାଇଁ ଅଫଲାଇନ୍ ଆବେଦନ କରାଯାଇଥିଲା। କିନ୍ତୁ ତହସିଲଦାର ଅନଲାଇନ୍ ଆବେଦନ କରିବାକୁ କହିଥିଲେ।
ହାଇକୋର୍ଟ କହିଛନ୍ତି ଯେ Rule 38 ଅନୁଯାୟୀ ନିର୍ଦ୍ଧାରିତ ଫି’ ପ୍ରତି ପ୍ଲଟ୍ ₹୪ ଥିବାବେଳେ ଅଫଲାଇନ୍ ଆବେଦନକୁ ମନା କରି ₹୮୦୦ ପ୍ରତି ପ୍ଲଟ୍ ଦାବି କରିବା ଆଇନସମ୍ମତ ନୁହେଁ।
କୋର୍ଟ ତହସିଲଦାରଙ୍କୁ ଅଫଲାଇନ୍ ଆବେଦନ ଗ୍ରହଣ କରି ନିର୍ଦ୍ଧାରିତ ଫି’ ନେବା ଏବଂ ଚାରି ସପ୍ତାହ ମଧ୍ୟରେ ଡିମାର୍କେସନ୍ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ ଦେଇଛନ୍ତି।
ଜମିର demarcation ପାଇଁ ଅନଲାଇନ୍ ଆବେଦନ ହିଁ ଏକମାତ୍ର ଉପାୟ ନୁହେଁ। ଆବେଦନକାରୀ ଚାହିଲେ Rule 38 ଅନୁଯାୟୀ ଅଫଲାଇନ୍ ଆବେଦନ କରିପାରିବେ ଏବଂ କେବଳ ଅନଲାଇନ୍ ପୋର୍ଟାଲ୍ ଥିବା ଦର୍ଶାଇ ₹୮୦୦ ପ୍ରତି ପ୍ଲଟ୍ ଦେବାକୁ ବାଧ୍ୟ କରାଯାଇପାରିବ ନାହିଁ।
Post a Comment